"ليه بنحب الأب الروحي للتراب "مروان بابلو 

مروان احمد مطاوع أو كما هو مُلقب ببابلو الرابر التقريبًا الكل يعرفه واحد من أقوى الرابرز في السين المصري والعربي التراكاته الكل يشهد بقوتها وجودتها وعلى الرغم من النقص الشديد في إنتاج بابلو للمزيكا إلا أنه بمجرد نزول تراك لمروان بابلو بيقدر يسرق الأضواء من الكل وهنا نسأل السؤال ونقول ليه؟

شئ زي كده صعب جدًا الرابرز بيسعوا دايمًا أنهم يكونوا على الساحة عشان تراكاتهم تعمل أثر ولكن على الرغم من كده بابلو بكام تراك فالسنة عنده القدرة أنه يبقى ترند 

وإجابة سؤال ليه هي إجابة بسيطة جدًا وهي الجودة 

بابلو بيقدم جودة عالية مش كمية عالية كل تراك لبابلو معمول بحرفية شديدة جدًا من قوة الكلمات لعظمة الفيديوز بتاعته فمهما نزلت فيديوز قوية محدش ابدًا هيقدر ينسى تراك فري العمل نقله في السين من حيث كل حاجة 

التعاون الأقوى والأشهر بين مروان بابلو ومولوتوف اللحد دلوقتي على الرغم من مرور تلت سنين على إصداره مازال كتير جدًا بيعتبروه أعظم تراك في تاريخ الراب سين المصري وده مش من فراغ التراك متكامل حرفيًا كلمات قوية وفيديو بجودة عظيمة وخصوصًا أن الفترة ديه كان لسه السين المصري موصلش للمرحلة الحالية من القوة ولكن فري مش بس التراك القوي لبابلو

مروان بابلو عنده تراكات مش كتير مقارنة بباقي الرابرز لكن تراكاته بتتميز أن فيها نوع من التميز والإختلاف فمثلًا لما تبص على تراك زي سندباد المفيش تراك فالسين يتقارن بيه اصلًا هتلاقيه مختلف عن غابة وهكذا فمروان عنده القدرة أن يكون متجدد في طريقة كتاتبته بشكل كبير وعنده القدرة أنه يعلي على نفسه في جودة الفيديوز بتاعته 

وبابلو مدرك وبشدة أن الفانز مش بيبصوا ليه زي باقي الرابرز هما دايمًا منتظرين من بابلو الجديد فمثلًا لما بابلو نزل راكور والحلال على الرغم من مدى قوة التراكين خصوصًا الحلال البعتبره من وجهه نظري الشخصية أقوى تراك لبابلو من حيث الكلمات إلا أن الفانز كانوا منتظرين اكتر كانوا منتظرين فيديو يقلب الدنيا ويبقى ترند 

وعشان كده الالبوم بتاع بابلو الهوا حاليًا شغال عليه لازم يكون نقلة قوية لأنه بيشوق الفانز ليه من 2022 في تراك بربري 

طيب ايه البيخلي كلمات بابلو قوية 

بابلو أسلوب كتابته مميز جدًا من نواحي كتيرة أهمهم أنه بأشكال كتير طيب ده معناه ايه؟

معناه أن بابلو دايمًا ليه وشين مختلفين تمامًا عنده بابلو إسكوبار البيحب يفلكس على اعداءه وعنده وش بابلو بيكاسو البحسه حقيقي اكتر الفيه بابلو بيعبر عن معاناته في ماضيه وعن الصعوبات البيمر بيها والحقيقة بابلو متميز جدًا  فالأسلوبين فتراك مثلًا زي الحب فين لما نيجي ونبص عليه هنلاقي قوة بابلو فالكتابة بجد وخصوصًا البار البيقول فيه 

"الحقيقة كان لازم قلم للقصيدة" 

البار ده على الرغم من بساطته إلا أنه مثال على عبقرية بابلو فالكتابة فاحنا ممكن نفهمها قلم كأداه للكتابة وممكن نفهمها كألم عشان بابلو يتحفز ويكتب وممكن نفهمها كضربة عشان يفوق ويكتب القصيدة فده مثال بسيط على قوة مروان بابلو

و القوة ديه موجودة فكل تراكات مروان على دراجات متفاوتة اكيد بس دايمًا حاضرة وده مش موجود كتير عند باقي الرابرز 

طب نسأل نفسنا ونقول ليه الفيديوز بتاعت بابلو مميزة جدًا عن الباقي

الحقيقة إجابة السؤال ده هي إختيار بابلو للتيم البيشتغل معاه من مخرجين لمصممين ملابس لمسؤولين المونتاج وطبعًا الإختيار القوي للبروديسرز فبابلو خلال كاريره أقوى تعاوانات ليه كانت مع مولوتوف وحاليًا مع هادي معمر فالفيديوز القوية ديه بتيجي بسبب التيم المحترف والصبر لإنتاج محتوى قوي بالشكل الاحنا بنشوفه

"خلاصة الكلام أن مروان بابلو "الأب الروحي للتراب 

محدش هيقدر أبدًا ينكر مدى قوته وسبب حبنا ليه هو مدى جودة الأعمال البيقدمها وكلنا متشوقين وبشدة أننا نشوف ايه الجاي من بابلو